Á ríkið friðland Hornstranda?

Í 13.tölublaði fjórða árgangs blaðsins Vestfirðir, var á bls. 6 fjallað um hátíð eða ráðstefnu sem haldin var 12.júní 2015 í Edinborgarhúsinu á Ísafirði, til að minnast þess að 40 ár voru liðin frá stofnun friðlandsins á Hornströndum. Ef þið lásuð þetta ekki á sínum tíma, ættuð þið endilega að gera það.     (Lesið líka frásögn Matthildar Guðmundsdóttur, á bls. 8-9 í, um lífið á Látrum í Aðalvík.)

Ekki hefur tekist að finna aðra frásögn frá nefndri ráðstefnu, og því var umrætt blað að standa sig betur en aðrir og á þakkir skildar fyrir þessa umfjöllun…….. EN……. !

Þrátt fyrir að liður á dagskrá hafi borið titilinn “Landeigandi í friðlandi” skrifaði blaðið ekki eitt orð um það erindi. Hvers vegna er það svo? Tilviljun? Hentaði það ekki málstaðnum? Er það málefni eitthvað sem ekki má tala um?

Það er eins og ráðstefnan hafi fyrst og fremst verið haldin til að  –  hnykkja á – leggja áherslu á –  að friðlandið hafi verið –  og verði um alla framtíð – fyrst og fremst til, svo að hægt sé að framkvæma þar rannsóknir. Nú skal mæla fugla í tonnum! Refir eru heilagar skepnur eins og kýr á Indlandi, sem ekkert má granda. Ég er ekki viss um að þeir sem hafa unnið við þessar rannsóknir, geri sér almennt grein fyrir því, að oftar en ekki hafi verið rannsakað á jörðum í einkaeign. Svo er það ferðamannaiðnaðurinn – hann virðist orðinn álíka heilagur og refurinn og skal settur ofar landeigendum við flokkun á mikilvægi.

Stór hluti friðlandsins er í þinglýstri einkaeign – og í mörgum tilfellum voru eigendur að greiða skuldir og gjöld af þessum jörðum áratugum saman eftir að allt fór í eyði, og það á sama tíma og fjölskyldurnar voru að greiða af nýjum fasteignum á nýjum stað.

Er það virkilega svo, að fjölmiðlar ætli að þegja sjónarmið landeigenda í hel?  Tískuhugtakið er þöggun. Ef það er þannig, verða landeigendur að hisja upp um sig, og koma sjónarmiðum sínum á framfæri! Ég veit að ég hljóma eins og rispuð vinylhljómplata þegar ég minni á að það styttist í að Óbyggðanefnd fjalli um svæðið.

Er það kanski þannig að allur almenningur – blaðamenn þar á meðal – líti nú þegar þannig á, að fríðlandið sé í eigu ríkisins? Það skildi þó ekki vera.

Ásgeir

PS: Ef einhvern langar að lesa eitthvað sem fljótlegt er að sofna út frá – þá er þessi texti sem vísað er í hér, vel til þess fallinn.